قرايبنا وأخواتنا وأصحابنا اللي في محنة!!
كتير من قرايبنا وأخواتنا وأصحابنا بيبقوا في محن وإحنا مش واخدين بالنا ، وده علشان مافيش تواصل بنا ، أو التواصل من بعيد لبعيد وهما بيبقوا في حالة عفة شديدة فبتكسفوا يطلبوا مننا حاجة ، فبتبقى النتيجة إنهم بيفضوا تعبانين ومحتاجين ، وقد يلجئوا للغريب إضراراً ، مع إن أقرب الناس ليهم يقدروا يساعدوا بس علشان هما بُعاد عنهم مش حاسيين بيهم .
قرايبنا وأخواتنا وأصحابنا محتاجينا فعلاً :
الرسول صلى الله عليه وسلم وصانا على قرايبنا وقالنا نصل الرحم ، وربنا سبحانه وتعالى قال في القرآن الكريم "الأقربون أولى بالمعروف" والحديث القديسي عن فضل الرحم لما ربنا قال "من وصلها وصلته ومن قطعها قطعته " كل دي معاني تخلينا نجري نساعد أي حد من قرايبنا أو أخواتنا محتاج بجد ، واللي ليهم حقوق علينا زي أصحابنا ومعارفنا وجيراننا .
ببساطة إحنا لو ما ساعدناش في كده هيلجئوا لأي حد ، أو هيفضلوا مكانهم أو الحالة هتسوء أكتر وهيضيعوا ، أو يلجئ حد منهم أنه يعمل حاجة غلط أو حرام في سبيل إنه يلاقي اللي هو محتاجه ، كل واحد وعلى حسب قوة إيمانه بربنا ، فأحنا ليه نديلهم فرصة يفكلوا في حلول وإحنا الحلول نفسها .
فيديو توضيحي بعنوان : اللي مني مبهدلني
قرايبنا وأخواتنا وأصحابنا اللي في محنة :
كتير من قرايبنا وأخواتنا وأصحابنا ممكن يكونوا في محنة ، ممكن يكونوا في حاجة لينا ، ممكن يكونوا في أزمة صحية أو أزمة مادية ، وأحنا في وادي وهما في وادي تاني ، والنصيحة البسيطة ، ياريت نحس ببعض ، ونسأل على بعض ، لإننا غير أننا هنتسأل قدام ربنا ، دلوقتي مابقاش العمر بيساعي ، الناس بتموت فاجئة وبتتعب فاجئة وبتروح قدام عينينا فاجئة ، فخلينا مصحصحين ومركزين مع أقرب الناس لينا ، علشان ناخد ثواب ونأخد بإيديهم ، وربنا يكرمنا جميعاً .
المقالة دي رسالة من القلب لكل حد عنده حد من قرايبه ومش شايفة ومش حاسس بيه ومش بيسأل عليه ، وهو لو عمل كده هياخد ثواب عظيم ، لو سئل له ثواب لو زار له ثواب ، لو دعا ربنا له ثواب ، لو ساعد له ثواب ، لو ساعد بفلوس أو بمكالمة أو بواسطة في الخير له ثواب ، فأرجوكم مانضيعش من إيدينا ثوابات عظيمة في الهواء ، ونتسئل قدام ربنا عن تقصيرنا في حقوق أرحامنا وأصحابنا ومعارفنا ، مع أننا كنا نقدر وكنا قدها وكان في إستطاعتنا ومقدرتنا نساعد ، واحنا اللي كبرنا دماغنا وطنشنا .
بقلم : أحمد محمد عبد المنعم
ليست هناك تعليقات
الأبتساماتأخفاء الأبتسامات